TACLOBAN CITY – Dire pa sigurado an Probinsya han Northern Samar kun magdedeklara hira hin State of Calamity ha ira probinsya mahitungod han nakuha hine nga danyos ha naglabay nga bagyo.
Ha pahayag ni Northern Samar Board Member, Don Abalon, ginmalatumat hine nga nagde-desisyon ngan naghuhulat pa hira han mga datos ngan assessment tikang ha magkaduru-dilain nga lugar han ira probinsya kun may kaangayan ba nga magdeklara hira hin State of Calamity.
Ha nahitabo nga ira pagharampang in huhulton pa daw nira an magigin desisyon ngan rekomendasyon han Provincial Disaster Risk Reduction and Management Council (PDRRMC) han ira probinsya.
Gin pahayag gihapon han nasabi nga opisyal nga waray na mga indibidwal ngan pamilya nga nagpapabilin ha mga evacuation centers mahitungod nga nagka-uli na an mga ine.
Samtang, ha pagkayana in bumalik na daw ha normal an ira panahon mahitungod nga humubas na an baha kumpara dida han nakalabay nga adlaw kun diin naka-eksperyensya hira hin dako nga baha ha magkaduru-dilain nga lugar han Northern Samar.
