Nagpahimatngon hi Presidente Donald Trump nga posible mag-iha hin pira kabulan an naval blockade han Estados Unidos kontra ha Iran, nga nagdurot hin tigdaay nga paghitaas han presyo han lana ha pinakahitaas hini nga lebel ha sobra upat katuig.
Ha butnga han dire naabnse nga diplomasya ha butnga han Iran ngan Estados Unidos mahuman an pira nga napakyas nga pagtitikang han istorya, kun diin nakig-istorya ha telepono hi Trump kan Russian President Vladimir Putin. Nagpahimatngon naman hi Putin nga magkakamay-ada hin ‘matindi’ nga kamumutangan kun igpapadayon han Estados Unidos ngan Israel an ira kasamok kontra ha Iran.
Ha usa nga pagharampang kaupod an mga opisyal han industriya han lana, iginduon hi Trump nga mas epektibo an pagbalabag ha mga pantalan han Iran kumpara ha pamboboma. Maiha na nga iginduduso han Tehran nga kinahanglan tanggalon an blockade ugsa magkamay-ada hin anuman nga kasabutan.
Subay ha usa nga opisyal han White House, ginhingadayan ni Trump ha usa nga pagharampang dida han Martes an iya mga pitad agud mapagaan an epekto ha world market han lana, ngan kun patiunan-o maipagpapadayon an blockade hin pira kabulan kun kinahanglan samtang ginpapaguti an epekto hini ha mga mamaralit nga Amerikano.
