BORONGAN CITY – Waray nao-obserbahan nga paghitaas han presyo han mga panguna nga produkto ha Eastern Samar.
Ini in sumala kan Department of Trade and Industry (DTI) Provincial Director Ruthelma Samonte ha gindumara nga joint meeting han Provincial Disaster Risk Reduction and Management Council (PDRRMC) ngan Provincial Development Council (PDC).
Ginpasabot ni Dir. Samonte nga diri la an DTI an may responsibilidad ha pag-monitor han presyo ha merkado, kundi may mga partikular nga ahensya nga may mandato ha ilarom han Price Act o Republic Act No. 7581.
Sumala pa ha iya, an DTI an nakatutok ha presyo han mga basic necessities sugad han canned fish, processed milk, sabon panlabá, asin, tinapay, detergents, kape, kandila; ngan han mga prime commodities sugad han harina, semento, tuyo, suka, de lata nga corned beef, noodles, processed and canned pork, school supplies, patis, sabon, hollow blocks, baterya, raysang, ngan papel.
Dugang pa ni Samonte, an Department of Agriculture (DA) amo an nagmo-monitor han presyo han bugas, mais, lana, asukar, isda, bonay, karne, ngan mga presko nga produkto.
An Department of Health (DOH) namam an may hurisdiksyon ha medisina, an Department of Environment and Natural Resources (DENR) ha mga kahoy ngan pawod samtang an Department of Energy (DOE) ha mga produktong petrolyo ngan LPG o cooking gas.
Ginsiguro pa ni Samonte nga padayon an ira weekly price monitoring, ngan regular hira nga nagre-report ha DTI Regional Office.
Ha pinakabag-o nga monitoring report han DTI dida han Mayo 27 matapos han temporaryo nga mga limitasyon ha San Juanico Bridge – napulo nga establisimento an ira ginsubaybayan.
An mga gudtiay nga tindahan ha merkado in stable gihapon an presyo.
Bisan man may pipira nga delay ha delivery, waray ini magin rason hin price increase, ngan an presyo namamaneter ha ilaróm han Suggested Retail Price (SRP).
Samtang, an iba nga tindahan mayda pa usá ka-bulan nga stocks tikang ha Catbalogan ngan Calbayog, ngan ginlalaoman nga maabót na an iba nga delivery.
Padayon an paningkamot han DTI ha pag-monitor han presyo basi masiguro nga mapapanalipdan an mga konsumedor ha butnga han mga hamubo nga pagka-urhi ha delivery. (via Bombo Shiela Encio)
