NATIONAL – Nagpapabilin nga hitaas an presyo han karne han baboy, ha kaluyo han iginpapatuman nga Maximum Suggested Retail Price (MSRP).
Sumala kan Agriculture Assistant Secretary for agribusiness, marketing and consumer affairs Genevieve Velicaria-Guevarra, base ha ira pagbisita ha pira nga mga merkado, na-obserbaran nira nga mas hitaas hin 60 ka pesos kada kulo an retail price han baboy tikang ha MSRP.
Ha pork belly, ginbabaligya ini ha presyo nga 420 ka pesos kutob 440 ka pesos kada kilo, samtang ha pork shoulder naman in nagmumulay an presyo ha 370 ka pesos kutob 380 ka pesos kada kilo.
Pag-isplikar han opisyal, klaro na nga mas hitaas an mga nasabi nga presyo kumpara ha maximum SRP han pork shoulder nga 360 ka pesos kada kilo ngan pork belly nga 380 ka pesos kada kilo.
Dugang pa niya, nakaka-alarma ini mahitungod nga an farmgate price han karne han baboy in nagpapabilin nga aada la ha 250 ka pesos kutob 255 ka pesos.
Ha kaluyo hini, gin-aghat han opisyal han DA an mga retailers nga ig-angay an ira mga presyo ha guidelines han gobyerno, labi na nga humamubo an pira nga delivery costs.
