NATIONAL – Gin kumpirma han Philippine National Police (PNP) an pagsaka han ihap han mga nahipapatik nga election-related incidents ha nasud pira kaadlaw ugsa an eleksyon.
Subay ha PNP, sumaka na ha 40 an kabug-usan nga ihap han mga nahipatik nga insidente kun diin tikang ha nasabi nga ihap, 26 an nahipatik nga violent, samtang 14 naman an mga non-violent.
Kadam-an ha mga nahipatik in tikang ha Bangsamoro Autonomous Region in Muslim Mindanao (BARMM) nga sinundan naman han Cordillera Administrative Region (CAR), Zamboanga Peninsula, ngan Cagayan Valley.
Samtang, padayon naman ha pagkumpirma an PNP ha 17 nga gin aalegar mga ERI ha mga lugar han Ilocos Region, Calabarzon, Bicol Region, Western Visayas, Northern Mindanao, ngan magin Davao Region.
Kasunod hine in humitaas gihapon an ihap han mga pagtalapas ha nagpapadayon nga gun ban ha nasud kun diin 2,923 nga mga indibidwal na an naaresto mahitungod ha gun ban violations.
Kadam-an ha nasabi nga ihap in tikang ha Metro Manila, sinundan han Central Visayas, ngan Central Luzon.
