TACLOBAN CITY– Ginpaangbit hiton Presidente han Pintados Foundation, nga dire magkakamayda hin parada an Pintados Festival ha maabot nga Hunyo 27, 2025.
Sumala kan Eugene Tan, President Philippine Chamber of Commerce and Industry Tacloban & Leyte, nag-aro hira hin permit ha lokal nga pangobyernohan hiton syudad han Tacloban, ngada pa han nakalabay nga bulan hiton Marso, pero hasta nga umabot nala an bulan hiton Hunyo, in waray la gihapon hira may nakarawat nga baton o katugutan.
Dugang pa hine, dire na hira naglalaom, matungod nga dire manla ine an syahan nga higayon nga waray hira tuguti nga makag parada ha syudad hiton Tacloban.
Ginmalatumat ni Tan, nga yana nga maabot nga Hunyo 27, alas 4 hiton kulop pagdudumaraon an mga pasundayag nga gin-andam han magkalain-lain nga munisipalidad ha RTR Plaza syudad hiton Tacloban, karuyag sidngon, tanan nga mga aktibidadis in pagdudumaraon ha nasabi nga lugar.
Lauman gihapon han mga magkirita nga magigin marisyo, ngan mahinungdanon an Pintados Festival yana nga tuig, matungod nga magkalain-lain nga karisyuhan an gin-andam han nasabi nga organisasyon.
Sanglit nga gin-iimbitaran hine an ngatanan nga maki-usa ngan makiduyog ha tiarabot Biyernes hiton kulop, kumo pagselebrar han kapyestahan ni Sr. Sto, Niño de Tacloban.
Mababaruan nga nakipagkoordinar an Pintados Foundation ha Tingog Partlylist, magin kan House Speaker Martin Romualdez, kun diin igdudungan an nasabi nga mga pasundayag ha pagdudumaraon nga pasasalamat hiton Office of the House Speaker.
