TACLOBAN CITY – Nagkakamay-ada hin koneksyon an magkaduru-dilain nga henerasyon—bata man o edaran—pinaagi han pickeball, usa nga sport nga nagpapakita han inklusibo nga kultura ha community recreation ngan padayon ngan padayon ine nga nasikat ha Leyte samtang damo gihapon nga residente an naaaghat ha karisyo ngan kalipay nga durot hine.
Samtang, padayon nga naribhong an pickleball, in natuod naman an mga advocate hine—sugad kan Leyte Board Member Wilson Uy—nga pwede magserbi nga modelo an mulay kumo community sports nga ginpa-prayoridad an partisipasyon, accessibility, ngan koneksyon.
Sumala pa kan Uy, naghihimo an pickleball hin inklusibo nga kultura kun diin may lugar ha court an katawhan, anuman an edad o estado ha kinabuhi.
An pickleball in gin urusa nga elemento han tennis, badminton, ngan table tennis, sanglit madagmit ine mahibaruan pero challenging sanglit ginbabalik-balikan han mga nagmumulay.
Para ha kabataan, an pickleball in mulay nga naghahatag hin adrenaline ngan nagpapagawas han pagigin competitive, pero dire sugad kabug-at ha lawas kumpara ha iba nga sports nga ginbubuhat ha dagko nga court.
Para naman ha edaran, paagi an pagmumulay han pickleball agud magpabilin nga aktibo. Mahitungod nga dire sugad kabug-at an epekto hine ha mga kasu-kasuhan, in maupay ine nga sports agud mapabilin an maupay nga panlawas.
Mahitungod ha pagsikat han pickleball ha Leyte, damo nga lokal nga pangobyernhan ngan mga grupo ha komunidad an nagko-convert han mga multi-purpose court agud himuon nga pickleball courts, ngan naghahatag hin libre nga clinics o training.
Ginkikilala han mga ine an potensyal han mulay nga magduso hin physical fitness, mental well-being, pakikiusa, ngan koneksyon han magkaduru-dilain nga henerasyon.
Madagmit gihapon nga sumikat an mulay nga pickleball, labi na ha Estados Unidos kun diin ine nagtikang ngan nagin billion-dollar industry ngan nagin dako nga kaparte han pop culture.
Ha presente, ada ha sobra 60 nga nasud na an nagmumulay hine, kalakip na an Pilipinas nga ginkilala han Global Pickleball Federation pinaagi han Philippine Pickleball Federation.
Subay pa ha pederasyon, padayon nga nagtitikadamo an nag-iinteres ngan membro hine ha bug-os nga nasud—usa nga trend nga klaro ngan nakikita an kalaksi han pagribhong ha Leyte.
Naglalaum naman an mga lokal nga nagduduso han nasabi nga spots nga pinaagi han padayon nga suporta tikang ha mga community program, ngan paghuhusay han mga pasilidad, in magpapadayon an pag-ursa han pickleball ngan magigin regular nga kaparte han aktibo nga panginabuhi han mga residente ha bug-os nga Leyte.
