NATIONAL – Nagsalawad hin petisyon an Partido Demokratiko Pilipino (PDP-Laban) ha Korte Suprema nga nanawagan para ha mano-mano nga pag-ihap han mga botos han pagka-Senador ha nakalabay nga 2025 midterm elections.
Hi Atty. Israelito Torreon an nagsalawad han motion for leave para ha pagsasalawad hin supplemental petition for mandamus para ha utro nga pag-ihap han Senatorial votes.
Kaupod gihapon ni Torreon nga nagsalawad hin mosyon hi PDP-Laban Senatorial candidate Atty. Jimmy Bondoc.
Ginpahayag han partido ha ira petisyon nga ginpapaumaya na nira ha discretion han Korte Suprema kun magdudumara ba hin manual counting o recount, subay ha pagpapatuman han kaangayan nga elections laws.
Igin duon gihapon han partido nga an ira panawagan para ha recount in basar ha Automated Election System Act ngan Omnibus Election Code.
Ha ilarom han Section 31 han Republic Act No. 9369, ginmamando an tradisyunal nga mano-mano nga pag-ihap han mga botos agud masigurado an free, tangkod, ngan matatapuran nga piniliay.
