TACLOBAN CITY – Malinampuson nga nagdumara hin surprise drug testing an Philippine Drug Enforcement Agency (PDEA) Regional Office 8 ha mga drivers ngan konduktor ha Abucay New Bus Terminal ngan Marasbaras Terminal ha Tacloban.
Sumala kan Director III Edgar Jubay, Regional Director han PDEA Regional Office 8, an Oplan Haraba in nasusubay ha probisyon han Republic Act 9165 o An Comprehensive Dangerous Drugs Act of 2002 sugadman han RA 10586 o Anti Drunk and Drugged Driving Act of 2013 ngan Dangerous Drugs Board Regulation No. 2 Series of 2004.
Dugang pa hini nga an mao nga simultaneous mandatory surprise drug testing nga gindumara ha mga terminal ha bug-os nga nasud in nagpapanuyo nga masiguro nga an mga drivers ngan konduktor in mga drug-free o dire nagamit hin illegal nga droga para ha katalwasan han mga pasaheros.
Nahibaruan nga an mga drivers nga magpopositibo ha illegal drugs test in dire tutugutan nga magbiyahe ngan igkokompiskar han LTO an mga lisensya hini para matagan hin iwag an rehabilitation process para ha mga ini.
