Gin anunsyo han World Health Organization nga aprubado a hini an usa nga tambal kontra ha malaria partikular na para ha mga bag-o nga anak nga kabataan.
An artemether-lumefantrine an pinakasyahan nga medisina kontra ha malaria nga gintuyo paghimo para ha pinakabata nga naapektaran han sakit nga dara han lamok.
Han una, an mga kabataan in gintatambal gamit an mga tambal nga para ha mas dagko na nga kabataan, nga mayda mas hitaas nga kadelikaduhan hin sayop nga dosage, side effects, ngan pagkahilo.
Sumala kan Tedros Adhanom Ghebreyesus, maiha na nga namamatay hin kinabuhi han kabataan an sakit nga malaria ngan nagruruba han panlawas, pakabuhi, ngan paglaum han mga kumunidad.
Pero sumala pa hini, nagbabag-o an sitwasyon. An mga bag-o nga bakuna, mas maupay nga panginano, makaba-o nga proteksyon, ngan mas epektibo nga tambal, labi na an akma para ha mga kabataan, in nabulig agud mapaubos an epekto han sakit.
Dugang pa hini, an pagpuypoy han malaria in dire la hingyap kundi posible makab-ot, basta mayda padayon nga suporta tikang ha gobyerno ngan suprisyente nga pondo.
Dida han 2024, ginbabana-bana nga umabot ha 282 milyon an kaso han malaria ngan 610,000 an namatay ha 80 nga nasud, subay ha WHO.
Ginmalatumat gihapon han ahensya nga nababalabgan an pag-ursa kontra ha malaria mahitungod ha paghitaas han resistensya ha mediasina ngan insecticide, kakulangan ha maupay nga diagnosis, ngan dako nga pag-iban ha bulig-pinansyal tikang ha iba nga nasud.
Subay ha WHO, an pag-apruba hini in maghahatag hin dalan agud mapalit ngan magamit an tambal ha pampubliko nga sektor, ngan makakabulig agud mabaton an maiha na nga kakulangan ha pagtambal para ha sobra-kulang 30 milyon nga kabataan nga igin aanak ha kada tuig ha mga lugar ha Africa nga hurak an malaria.
Ha bug-os nga kalibutan, ginbabana-baan nga 70% han mga nasud in kulang ha madig-on nga sistem agud masigurado nga talwas ngan epektibo an mga medisina, bakuna, panginano, ngan kagamitan nga medikal.
Ginsisigurado han prequalification program han WHO nga an importante nga produkto nga panlawas nga ginagamit ha iba-iba nga nasud in pasado ha world standard han kalidad, katalwasan, ngan bisa.
