NATIONAL – Gin-aprubahan na ni Presidente Ferdinand Bongbong Marcos Jr. an pag-aabre hiton klase ha Hulyo 29, 2024 kutob Abril 15, 2025 para ha school year 2024-2025.
An mao nga pitad in para ha hinay-hinay nga pagbalik han school days ha traditional arrangement.
Una hini nagkaada hin meeting hi Presidente Marcos kaupod hi Vice President ngan DEPED Secretary Sara Duterte kun diin ginpresentar an duha nga option para maibalik ha dati nga June-March an school calendar.
An syahan nga opsyon in magkaada hin 180 school days ngan 15 in-person Saturday classes samtang an second option naman in magkaada hin 165 school days ngan waray in-person Saturday class nga parehos maghuhuman ha Marso 31, 2025.
Pero ginpahayag ni Presidente Marcos nga halipot la an 165 days ngan nadire gihapon hiya nga sumulod ha eskwelahan an mga estudyante ha kada Sabado.
Dugang pa han pangulo nga imbes nga magtapos ha Marso 31, 2025 in kinahanglan nga ig-adjust han DEPED an school year ha Abril 15, 2025 agud nga makompleto han mga estudyante an 180 kaadlaw nga dire na kinahanglan nga sumulod ha eskwelahan kada Sabado an mga estudyante.
Para ha school year 2025-2026 in mabalik na ha June an pag abre han klase ngan magtatapos ha Marso ha 2026 o an dati nga tradisyunal nga school calendar.
