ISABEL, LEYTE – Gindiwara ni Leyte 5th District Board Member, Carlo Loreto nga mayda na pauna nga hazardous medical waste an gindara o ginlabog ha usa nga waste management facility ha bungto han Isabel, Leyte.
Ine in subay ha resulta han gindumara nga pangingano han mga ginmanduhan ni Gov. Carlos Jericho Petilla.
Sumala pa kan BM Loreto, ha ira naglabay nga sesyon dida han Hulyo 17, nagsalawad hiya hin damo nga resolusyon nga nagmamando ha Philippine National Police, Armed Forces of the Philippines, ngan iba pa nga ahensya hin cease and desist order ha pagkarawat ngan pagbiyahe han mga hazardous waste materials tikang ha Mandaue City, Cebu.
Dugang pa hine, dako an posible nga kadelikaduhan nga igdurot hine ha katawhan ngan kumunidad kun mahidayun an pagdara hine ha Leyte.
Ginpasabot gihapon han nasabi nga magbabalaod nga waray makigsumpayan o igpasabot ha ira ine nga plano kun diin nahibaro nala hira dida han pagdadad-on na ine.
Magdudumara naman hin imbestigasyon an Sanggunian Panlalawigan kasumpay hine kun diin pangungunahan ine han Committee on Health, Committee on Environment and Natural Resources, ngan Committee on Disaster Risk Reduction Management.
Manunumduman nga plano dad-on ha Cleanaway Environmental Management Solutions Inc., usa nga waste management facility ha Isabel, Leyte an gin aalegar sobra 300 ka-drums hin mga medical waste tikang ha hospital ha Mandaue City ha Cebu.
