TACLOBAN CITY – Patay na han mahi-abtan hiton mga otoridad an usa nga lalaki samtang nakasakay ine ha pumpboat, kun diin gin aalegar nga naigo ine hiton kidlat samtang sakay han pumpboat ha Brgy. Tabunan, Borongan City.
Ginkilala an biktima kan alyas Renato, 47-anyos an pangidaron, ngan residente han nasabi nga barangay.
Sumala kan Borongan City Police Office Chief of Police, PLt. Col. Clark Chavaria, nakakarawat hira hin tawag tikang ha usa nga concerned citizen kasumpay han ira nahikit-an nga patay nga lawas kun diin dayun naman ine nga gin respondehan han mga kapulisan.
Basar han imbestigasyon, agsob nga magpalawod an nasabi nga parupangisda kinada-maagahon, agud ngna makapangisda.
Mababaruan, nga ha nasabi nga adlaw han iya pagpalawod in dire maupay an sitwasyon han panahon, ngan didto na nataraan hiton kidlat ha kalalawdan matungod nga may sunog an parti han ulo hiton biktima han mahikit-an ine han mga nag responde, ngan ine an ginkikita nga rason han mga otoridad han iya nagin kamatayon.
Dayun naman an mga ine nga nagpahibaro ha paryente han biktima ngan gindara ine ngadto han panimalay hine.
Waray naman igpailarom han pamilya ha autopsy an biktima, mahitungod kumbinsido an mga ine nga kidlat an hinungdan han nagin kamatayon han biktima.
