TACLOBAN CITY – Waray na kinabuhi han makit-an han usa nga concern citizen an usa nga gintutuohan nga sundalo ha kabukiran han Sitio Tagcalapi Brgy. Balocawehay, Abuyog Leyte.
Ginkilala an biktima kan Philippine Army na si Private First Class Aries A. Ampoan, 21- anyos an panuigon ngan myembro han 14IB, PA, ngan residente han Brgy. Jasminiz Gandara, Samar.
Sumala kan PMAJ. Luis Hatton, Chief of Police Abuyog MPS, nga naka-karawat hira hin tawag tikang ha Brgy. Kapitan han Balocawehay, nga daw in mayda nakit-an nga patay nga lawas ha may Coconut Farmers Sitio Tagcalapi.
Dayon naman ine nga ginkadto han mga otoridad, ngan han pag-abot nira ha nasabi nga lugar in nadidto mangud an lawas han biktima ngan ine in ada na ha state of decomposition.
Subay pa ha mao nga opisyal, nga han yana la nga bulan in nagkamayda hin pagpaptrolya an nasabi nga biktima kaupod hi CAFGU Active Auxiliary (CAA) Noel Montiera, matungod nga daw in mayda nasipatan nga nagliliyong-liyong nga mga gintutuohan nga Communist Terrorist Group (CTG) ha Sitio Balibulan, Brgy. Katipunan, Abuyog, Leyte, ngan tigda nala an mga ine nawarayan hin kontak o signal ha ira mga kabaro.
Hapagkayana, padayon an ginhihimo nga imbestigasyon ngan Search and Retrieval operation ha nasabi nga lugar agud nga mahibaruan gihapon an sitwasyon han iya kaupod nga hi CAA Montiera.
