Nagsalawad hin mosyon an National Bureau of Investigation agud magdugang hin panibag-o nga ebidensya ngan respondents ha reklamo nga plunder nga iginpasaka kontra kan Sen. Jinggoy Estrada.
Sumala mismo kan Justice Spokesperson Atty. Polo Martinez, ini in kasunod han ‘motion to submit additional evidence and respondents’ ha parte han ‘complainant’ o buhatan.
Ha nahitabo nga preliminary investigation kasumpay ha plunder case, igin paangbit han tagapagyakan nga waray magpasa hi Sen. Jinggoy han iya counter-affidavit.
Samtang, gin manduhan naman han prosekusyon an NBI nga tagan hin kopya an mga respondets han ira iglalakip nga mga kadugangan nga ebidensya ha reklamo.
Gintagan hin pira kaadlaw an mga respondents kutob Pebrero 26, 2026.
Sanglit ha oras nga matagan na hin kopya an mga respondents, gin sigurado han Department of Justice nga mayda na hira supresyente nga panahon ngan higayon agud batunon ini.
Sumala kan Justice Spokesperson Martinez, an mga respondents in pwede magpasa han ira mga counter-affidavit hin dire malahos ha gintalaan nga adlaw, ha Maros 9.
Ha Marso 9 gihapon pagdudumaraon an masunod nga preliminary investigation kasumpay ha reklamo nga gin kakaatubang han senador kaupod an pira nga mga anay opisyal.
Labot kan Senador Jinggoy Estrada, respondents gihapon magin hira anay Department of Public Works and Highways Secretary Manuel Bonoan, former Public Works officials Roberto Bernardo, Gerard Opulencia, Henry Alcantara, ngan John/Jane Does.
Kalakip gihapon an tumalikod na ha kadayunan nga ni former Public Works Usec. Catalina Cabral ha mga ginpasakahan hin kaso han Nationaal Bureau of Investigation-Department of Justice Bid-Rigging Task Force.
Gin kakatubang hini nga mga indibidwal an mga reklamo nga plunder, pagtalapas ha Section 3(e) han Republic Act 3019 o an Anti-Graft and Corrupt Practices Act, Receiving Gifts by Public Officers, ngan Corruption of Public Officers.
Kasumpay hini, waray na igpaangbit ni Justice Spokesperson Martinez an mga ngaran han mga igindugangan han buhatan kumo panibag-o nga respondents ha reklamo.
