TACLOBAN CITY – Usa nga insidente hin pan hold-up an nahipatik ha usa nga gasolinahan ha Eastern Barangay, Hilongos, Leyte.
Ginkilala an suspek kanda Marlon Erit, 23-anyos an pangidaron, ngan residente han Sitio Taboc, Brgy. Bagumbayan, Hilongos, Leyte ngan Henry Amores, ada ha legal nga pangidaron, ngan residente han Brgy. Atabay, Hilongos, Leyte.
Sumala kan PMaj. Ambrocio Demain, Chief of Police hiton Hilongos Municipal Police Station, nahitabo an insidente kakulop nga adlaw kun diin duha nga mga suspek an nagprubar nga holdapon an usa nga gasoline station ha nasabi nga lugar.
Basar hiton inisyal nga imbestigasyon, nagpasangil an mga suspek pagpagasolina ha nasabi nga gasolinahan han tigda la ine nga dumaop ha cashier ngan bumunot hin pusil. Waray naman ine mahidayun han ira plano mahitungod nga nahiduso an usa nga suspek han cashier, baga naman daw hin ginkasalan an suspek sanglit nagpabuto nala ine han iya pusil agud nga maka-iskapo, samtang natumba naman an usa pa nga suspek ha ginsasakyan hine nga motor mahuman nga igduso gihapon ine han cashier.
Armado naman hin calibre .45 an mga suspek kun diin amu ine an ginamit han mga ine ha pagprubar pan hold up.
Dayun naman nga naaresto an mga suspek ha gindumara nga hot pursuit operation hiton mga kapulisan.
Samtang, gin aalegar naman nga usa nga maestro an usa ha mga suspek mahitungod nga ha gindumara nga hot pursuit hiton kapulisan in may-ada an mga ine nahikit-an nga uniporme hin mga maestro ha gin-uukyan hine nga boarding house.
