TACLOBAN CITY – Usa nga insidente hin panhold-up an nahipatik banda ha may Fatima tikadto ha may Calanipawan nga area han syudad.
Sumala kan Tacloban City Police Office City Affairs & Development Unit Head, PLtCol Allan Camasin, an mga suspek in parehas 16-anyos an pangidaron.
Basar han imbestigasyon, katitikang pala ha usa nga event ngan nagbabaktas an duha nga biktima ha mayda Fatima nga banda, kun diin pag-abot han mga ine ha ha Calanipawan in mayda nag-istambay nga sarakyan ngan pag-tungod han mga biktima ha nasabi nga sarakyan in tigda nga gumawas an duha nga suspek ngan gintutukan hin pisaw an usa nga biktima, samtang nakadalagan naman an usa.
Nakuha ha usa nga biktima an dara hine nga bag nga mayda sulod nga kwarta ngan iba pa.
Nakag-report naman an duha nga biktima ha mga kapulisan kun diin dayun gihapon ine nga narespondehan.
Nakit-an naman an mga suspek ha may Sagkahan nga area kun diin pakasabot han mga ine nga mayda pulis in pumaharurot liwat ine kun diin nasagi pa an usa nga pulis nga nakamotor.
Napusil naman han usa nga pulis an kaliding han sarakyan han mga suspek rason nga na-flat ine ngan naabtan an mga suspek ha may LEYECO na nga banda.
Naka-iskapo an usa nga suspek, samtang arestado naman an usa pa, ngan napasakahan na gihapon hin kaso nga kriminal.
Ha pagkayana, in padayon pa gihapon nga gin iimbestigahan kun hin-o an tag-iya han sarakyan nga ginamit han mga suspek.
