Gin aghat ni Senador Francis “Kiko” Pangilinan an mga Local Government Units (LGUs) nga aktibo nga igpatuman an Sagip Saka Act agud mapakusog an kita han mga parag-uma ngan paru-pangisda pinaagi han direkta nga pagpalit han gobyerno han ira ani.
Ha usa nga dayalogo kaupod an 67 Mayors for Good Governance ngan mga opisyal han Department of Agriculture (DA) hadton Enero 30, ginbuhat ni Pangilinan an panawagan kun diin gintagan-duon hine nga importante an papel han mga lokal nga pangobyernuhan ha pagpapatuman han balaod nga ginpasar hadton 2019.
Ha ilarom han Sagip Saka Act, gintutugutan an mga ahensya han gobyerno ngan LGUs nga direkta nga pumalit han mga produkto tikang ha mga parag-uma ngan paru-pangisda hin dire naagi ha public bidding agud mautod na an papel han mga middleman ngan mapahitaas an kita han mga parag-uma ngan paru-pangisda.
Igin punto han senador nga an LGUs an pangunahon nga tagapagpatuman han mga programa nga pan-agrikulta mahitungod nga hira an mayda kapas nga dayun bumaton ha panginahanglan ha komunidad, sugadman an importansya han koordinasyon han nasyunal nga lokal nga pangobyernuhan agud maipaabat ha mga parag-uma an benepisyo han mga programa han gobyerno partikular ha sektor han agrikultura nga maiha na nga nakaka-eksperyensya han hamubo nga kita.
Kadungan hine, iginpahinumdom ni Pangilinan an pagpapatuman han Executive Orders Nos. 100 ngan 101 nga ginpirmahan ni Presidente Ferdinand Marcos Jr. hadton nakalabay nga tuig, kun diin an EO 100 in nagtutudlok han floor price ha humay agud proteheran an mga parag-uma kontra ha hamubo nga farmgate prices, samtang ginmamanduhan naman han EO 101 an ngatanan han ahensya han gobyerno nga igpatuman hin bug-os an Sagip Saka Act.
