TACLOBAN CITY – Ginpahayag han Department of Health (DOH) Regional Office 8 nga nagpatuman hira hin pagbabag-o han ira pagpapagawas han impormasyon o bulletin bahin ha ihap han mga naitatala nga COVID-19 cases ha kada adlaw ha Sinirangan Bisayas.
Sumala kan Jelyn Lopez-Malibago, information officer han DOH Regional Office 8, tikang ha daily COVID-19 cases tally, kinada semana na o weekly na an ira pagpapagawas han COVID-19 cases bulletin ha rehiyon.
Kalakip na gihapon hini nga ira ginpapagawas an COVID-19 vaccination status ha rehiyon o an ihap han mga nabakunahan na kontra ha mao nga sakit.
Nahibaruan nga ha pagkayana in maabot na ha 66% han target population ha rehiyon an fully vaccinated na kontra COVID-19 o an mga nakakarawat na hin duha ka-dose hin bakuna samtang 72% naman an naturukan na hin first dose han COVID-19 vaccines.
