HOMONHON, GUIUAN, EASTERN SAMAR–Padayon nga gin-iimbestigaran han Mines and Geoscience Bureau (MGB) regional office 8, an mga reklamo nga iginpapadangat ha ira opisina kasumpay ha mga pagmimina o pangutod hiton punong kahoy nga waray permiso.
Sumala kan Glen Marcelo Noble, Regional Director ng MGB-8, ha pagkayana mayda 3 nga rehistrado nga mining corporations nga mino-monitor han ira opisina.
Kalakip ha mga ine an Emir Mineral Resources Corporation (EMRC), Chromite King Inc., ngan Nickel-ace Inc.
Usa ha presente nga gin-iimbestigaran han MGB an reklamo nga ginsalawad han pira nga residente kontra ha Emir Mineral Resources Corporation, nga nagdumara ine hin pangutod hiton kahoy nga waray permiso ha Area 14, Barangay Casuguran, Homonhon Island, Guiuan, Eastern Samar.
Subay ha MGB, may permit to operate an EMRC ha Homonhon Island nga igin isyu hadton tuig 2024.
Ginmalatumat naman ni Carmi Macapagao, Pangulo han Homonhon Environmental Advocates and Rights Defenders, nga nagdumara hin tree cutting an nasabi nga kompaniya ha Area 14 nga waray naipapakita ga katugutan.
Dugang pa hine, ha ira pagbisita ha opisina han kompanya, waray gihapon ine naipresentar nga permit ha gindudumara nga clearing operation.
Butang nga ira ginkakabaraka matungod nga an Area 14 an ginkukuhaan hiton tubig han nasabi nga barangay.
Kumo baton, ginmatumat ni Noble nga dire kinahanglan hin permit kun waray naman nakatanom nga mga puno hiton kahoy.
Sugadman, kun magawas ha imbestigasyon nga may mga gin-utod nga puno hiton kahoy an nasabi nga korporasyon posible ine nga umatubang ha mga pagtalapas.
Ha pagkayana, nagpadara na an MGB han ira mga tinaglawas ha lugar ngan nakikipagsumpayan na gihapon hira ha Department of Environment and Natural Resources (DENR) ngan CENRO Borongan agud nga panginanuon an reklamo.
Ginlalauman naman nga igpapagawas ha masunod nga adlaw an resulta han imbestigasyon kadungan han pagsigurado han MGB nga maagi ine ha sakto nga proseso
o due process an bisan anu nga aksyon nga ira hihimuon.
