TACLOBAN CITY – Gintagan hin duon han Tacloban City Commission on Elections (COMELEC) Office nga an paglapos o pag-exceed ha campaign spending limits han mga kandidato han nakalabay nga eleksyon in maikokonsidera nga usa nga election offense.
Ini in kasumpay han panawagan han City COMELEC ha mga nagkandidato han piniliay nga magsumiter na han ira mga Statement of Contributions and Expenditures (SOCE).
Sumala kan Atty. Ramon Dadulla, Tacloban City COMELEC Officer, an non-filing o dire pagsumiter hin SOCE han mga nagkandidato han eleksyon in mayda kaangayan nga administrative fines o penalties pero dire ini usa nga election offense.
An maikokonsidera la nga election offense an mga kandidato nga naglapos han ira campaign maximum limit nga gintalaan han balaud.
Basar ha balaud ha syudad han Tacloban, an mga nagkandidato han eleksyon nga mayda political party in maabot ha P429,000 an maximum limit han ira pangangampanya o tres pesos ha kada usa nga registered voter ha syudad.
Samtang, an waray naman mga political party o an mga independent candidates in kutob ha P715,000 an spending limit o tag singko pesos ha kada botante ha syudad.
An hin-o man nga maglalapos ha mao nga maximum limit in maatubang ha election offense sugad han criminal case nga may kaangayan nga kaprisuhan o imprisonment penalties.
