Talwas nga nasalbar han mga otoridad an usa nga 31-anyos nga parupangisda tikang ha Barangay Combado, Maasin City, Southern Leyte, mahuman nga mawara ini hin tulo ka-adlaw sakay han iya pump boat nga urhi nga nasipatan ha kadagatan han Loay, Bohol.
Ginkilala an parupangisda kan John Vincent “Inting” Gaviola, residente han Maasin City kun diin, malinangpuson nga natad-an ini han Coast Guard Station – Southern Leyte ngan CDRRMO nga sakay han iya baloto ngan naglulutaw-lutaw ha kadagatan han Macrohon, Southern Leyte mahuman nga makakarawat hira hin report tikang ha mga lokal nga residente.
Base han imbestigasyon, nagkamayda hin engine-failure an pumpboat hini rason nga waray ini makabalik ha pampang.
Dayon naman nga nagdumara hin medical assessment an mga rumesponde nga CDRRMO kun diin, nakumpirma nira nga bisan man ini in dehydrated in dire naman aada ha kadelikaduhan an kinabuhi hini.
Nagpasalamat naman an Coast Guard Southern Leyte ha tanan nga LGUs nga kumarawat ngan bumaton han ira panawagan han magpagawas hira han missing person incident dida han mga nakalabay nga adlaw nga nagin susi agud matudlok an nawawara nga parupangisda nga yana in aada na ha ira panimalay.
