TACLOBAN CITY – Gin anunsyo han Leyte Provincial Jail nga “for approval” na an hangyo han ira buhatan ha Department of Education nga magkamay-ada hin Senior High School diploma an mga Person’s Deprived of Liberty ha ilarom han Barayong National High School.
Ginkikita naman nga pamaagi han pagtutdo ha mga PDL an modular learning method mahitungod nga delikado kun papagawson o igtitimpo an mga ine ha face-to-face nga klase.
Sumala kan Leyte Provincial Jail Warden PLt. Col. Joselito Villas, panuyuan han nasabi nga pitad in matagan hin paglaum an mga preso agud ha oras nga makagawas na mga ine ha presohan ine magamit nira ha kuminidad an mga hibaro nga ira na-adman ha pag-iskuyla.
Dugang pa hine, dire la hiunong han edukasyon an panuyuan han ira buhatan ha nasabi nga programa kundi hasta gihapon an ispirituwal nga aspeto han mga PDLs, sugadman an paghatag han Good Conduct Time Allowance (GCTA) agud maibanan an sentensya han mga ine pinaagi han pagkuha hin mga sertipiko nga magpapamatuod nga nag-gradwar hira ha pag-iskuyla.
Malipayon naman nga ginpahibaro ni Villaa nga ada na ha 28 nga mga PDLs an kwalipikdo nga mag-gradwar yana nga School Year.
Samtang, nanawagan naman hi Villas ha mga PDLs nga tagan hin panahon ngan oras an mag-upay nga mga butang nga waray nira kabuhat dida han libre pa an mga ine. (via Bombo Niña Magpili)
