NATIONAL – Gin panhimuwa han Department of Education (DepEd) an nagsasarang nga mga post ha social media nga makakakarawat an ngatan han mga istudyante hin P1,000 nga binulan nga allowance nga igpapanhatag daw tinikangan yana nga Hulyo.
Sugadman, igindiwara gihapon han ahensya an usa pa nga post nga nagyayakan nga igmamandato an sinemana nga alcoholic test para ha ngatanan han Junior ngan Senior High school student.
Ha igin pagawas nga advisory han DepEd, ginmalatumat han ahensya nga an nasabi nga mga post in fake news nga utro nga ginpahinumduman an publiko nga magin mahirot ngan mapanginano ha mga impormasyon nga naka-post online ngan atuhan an fake news ngan misinformation.
Gin sandunan gihapon han DepEd an publiko nga pumakiana la ha opisyal nga social media accounts han ahensya para ha lehitimo nga mga anunyso ngan impormasyon kasumpay ha basic education.
An pagsarang naman han sayop nga impormasyon in usa kasemana mahuman nga igsalawad ni Batangas Rep. Leandro Leviste an House Bill 27 nga may panuyo nga maghatag hin P1,000 nga binulan nga allowance agud masakop an mga gastuson han mga istudyante ha pagkaon, transportasyon, ngan ira nga kagamitan ha iskuylahan.
