TACLOBAN CITY – Waray kalikayi ni Ormoc Mayor Richard Gomez nga magpagawas han iya sintemyento ha gindumara nga meeting han Task force Ormoc City dida han usa ka adlaw.
Ini in may paghisumpay han sitwasyon han mga Locally Stranded Individual (LSI) nga mangunguli ha kada mga probinsya.
Nanawagan naman hi Mayor Gomez kan Pangulong Rodrigo Duterte nga igpasesante an mga organizer han mao programa tungod han diri maupay hini nga pagkapot.
Ha iya Facebook page in nagpost pa hin litrato an mao nga opisyal nga kun diin didto makikit-an an sitwasyon ha Rizal Memorial Stadium nga kun diin nagpupurundok an mga LSI.
Sumala pa hini, nga han kadako ha Rizal Stadium in waray daw huna-huna-e han mga organizer nga mamaximize an space han mao nga lugar.
Waray naman malikayi nga mabido labi na nga pira ha mao nga mga LSI in mauli ha Leyte ngan posible nga magdara hin kagaw han COVID-19.
