TACLOBAN CITY – Mas mahugot nga pagbantay an guinbubuhat han mga tinaglawas han Mahaplag PNP mahuman nga nagkamay-ada hin engkwentro an mga kasundaluhan han 78 Infantry Battalion ngan an pito nga miyembro han New People’s Army (NPA) partikular ha Sitio Canayan, Brgy San Juan, Mahaplag, Leyte kun diin nagbilin ini hin usa na patay na sundalo.
Sumala kan PSI Ryan Delima, hepe han Mahaplag PNP nga guinkilala an namatay kan Corporal Jose Pascual Saycon Jr. nga natawo ha Iloilo City samtang waray naman mahisabti kun may namatay ha han-ay han mga rebelde na grupo.
Mababaruan na umabot ha 25 minutos an pabalyuay hin buto nga nagdurot hin sobra nga kahadlok ha mga residente ha mao na lugar.
May kalabutan hini, nagsagdon naman hi PSI Delima ha publiko na diri mahadlok ngan likayan na magkamay-ada hin koneksyon ha mga NPA.
Una na guinpahayag hini nga nasisipatan an mga NPA ha mao na lugar ngan nakikialayon ha mga residente nga pumalit hin pagkaon.
May paghisumpay hini, guinduon ni Lieutenant Colonel Danilo I. Dupiag han 78 IB nga waray kalabutan ha eleksyon an presensya han mga NPA ha mao na lugar.
Guinpahayag pa hini, nga waray guinpipili nga mga higayon o oras an pag-atake han mga NPA ha kaluyo han guinlalauman nga pagmugna hini hin kasamok.
Samtang, nagbilin naman ini hin sagdon ha publiko kun ano an angay na buhaton kun may makit-an nga mga dudable nga mga katawhan ha kaluyo nga andam naman daw nga umaksyon an mga otoridad.
