TACLOBAN CITY – “Love for all and everybody.”
Ini an ginpadangat nga mensahe han Tzu Chi Foundation ha molupyo ha luyo na gihapon han pagsalinurog ha komemorasyon han ika-11 nga anibersaryo han Super Typhoon Yolanda.
Karuyag signgon mangud han mao nga mensahe nga an lahi ngan relihiyon in dire usa nga balakid ha pagbulig ngan paghigugma ha mga tawo labi na an panahon han panginginahanglan.
Sumala kan Tzu Chi Foundation Philippines Coordinator Jose Yu, nga presko pa ha ira mga huna-huna an paglasurbo ni Super Typhoon Yolanda ngan an ira pagbulig ha mga biktima nga bisan limitado an ira pondo in usa hira ha mga bumulig ha mga molupyo ha luyo han kalamidad.
Ini mangud nga ira mga ginbubuhat nga mga pagbulig in mahitungod han ira commitment ngan sugad man an ira pagtuo nga magigin maupay iton komunidad kun naghihigugmaay.
Ginkakalipay naman nira nga nakabakdaw na ngan mas rumibhong pa an siyudad han Tacloban, 11-ka tuig han nakalabay.
Samtang, ginpaangbit naman hini nga andam pirme an Tzu Chi Foundation para bumulig ha mga lugar nga naapektaran han mga kalamidad.
