TACLOBAN CITY- Kritikal an kondisyon han usa nga miyembro han third sex ha Tacloban City mahitungod nga guinpanbubuno han kalive-in partner hini mahuman la nga makipag-break.
Guinkilala an biktima nga hi Carl Loreto, 35 anyos an pangidaron ngan residente han Barangay 95 Caibaan ha mao nga syudad.
Samtang, guinkilala naman an suspek nga hi Jay Paul Tibay, 32 anyos an pangidaron ngan ka live-in partner han biktima.
Basi ha report han kapulisan nga nakipagbreak an biktima ha suspek nga nagresulta hin mapaso nga argumento kun diin dayon nga kumuha hin icepick an suspek ngan guinpanbubuno an biktima ha magkadirudilain nga parte han lawas ngan guinpanpukpok pa hin botilya an ulo hini.
Ha pagkayana, nagpapabilin pa ha hospital an biktima ngan ada ha kritikal nga kondisyon.
Samtang, arestado naman han mga otoridad an mao nga suspek.
