TACLOBAN CITY– Patay an usa nga mister mahuman ine nga tigbason han iya misis ha Brgy. 98 Camansihay, Tacloban City.
Ginkilala an suspek kan aylas Zelda 58-anyos usa nga vendor, ngan ginkilala naman an biktima kan alyas Tino, 67- anyos parag-uma ngan parehos residente han nasabi nga barangay.
Sumala kan PCpt Jefferson Arellano, OIC Station 3 Commander, Tacloban City Police Office, nga subay ha ira ginhimo nga imbestigasyon naghulga na an biktima nga papatayon an suspek, samtang ine in nag-iinom, ngan ha pagkinabuwasan in gin-ungod han biktima an iya hulga ha iya misis, kun diin han pro-probaran hine nga tawtawon gamit an iya bulo, in dagmit liwat in na-agaw hine han suspek, ngan ha dagmit nga panhitabo didto ginpananaw-taw na han suspetsado an iya mister.
Nakag-angkon hin mga samad, ha kamot, ulo, ngan magkalain-lain nga parti han iya lawas an biktima rason han iya dayon nga kamatayon.
Sumala naman kan Plt. Col. Allan Camasin, Information Officer, Tacloban City Police Office, gintutuohan nira nga selos an rason kun kay-anu natabo an dire pagkaka-intindihay han mag-asawa.
Dayon naman nga sumurender an suspek ha mga kapulisan mahuman an panhitabo.
Ha pagkayana, na-atubang na an suspek ha kaso nga Parricide.
