Waray kahingadayi an padayon nga kasamok ha Middle East ha nagin paghampang nira Presidente Ferdinand Marcos Jr. ngan mga US Defense officials nga gindumara ha New York, USA.
Sumala kan Palace Press Officer at Presidential Communications Office (PCO) Undersecretary Claire Castro, nakatutuok an paghampang ha pagpapakusog han Philippines–United States Defense Partnership ngan dire ha sitwasyon ha Middle East.
Ginmalatumat ni Castro nga kaupod ha mga ginhingadayan ha meeting an mga nakatalaan nga Balikatan exercises ha butnga han militar han Pilipinas ngan Estados Unidos, sugadman an padayon nga pagpapatuman han Mutual Defense Treaty han duha nga nasud.
Ha pakiana kun mayda bag-o nga commitment an Estados Unidos pag-abot ha security support ha Pilipinas, ginmalatumat ni Castro nga nagpapabilin an patapod han Amerika nga igpapadayon ngan papakusgon pa an defense partnership han duha nga nasud ha ilarom han nagpapadayon nga kasabutan.
Waray naman igin paangbit nga kadugangan nga detalye an Malakanyang kun may iba pa nga istoryahon nga nahingadayan ha nasabi nga pagharampang.
Ha nasabi nga pagbisita, nakigkita hi Presidente Ferdinand Marcos Jr. kan U.S. Undersecretary of Defense for Policy Eldridge Colby ngan ha iya delegasyon han New York.
Ha ira pagharampang, ginhingadayan an pagpapakusog han kapas han duha nga nasud ha pagbalabag ha mga hulga ha Indo-Pacific region, sugadman an pagpapaupay han koordinasyon ngan interoperability ha butnga han Armed Forces of the Philippines (AFP) ngan militar han Estados Unidos pinaagi han magkausa nga operasyon.
Utro nga ginpadig-on han duha nga parte an ira patapod ha Mutual Defense Treaty ngan an padayon nga pagbibinuligay agud mapabilin an kapas ngan seguridad ha Indo-Pacific region.
