TACLOBAN CITY – Emosyonal nga natuktok ha mayda mga bulawanon nga kasing-kasing an mga residente han Brgy. 39, Calvary Hill, Tacloban City kun diin nasunog an 59 nga kabablayan, nga buligan hira labi na mga kaurugan ha ira in waray may nahisalbar nga gamit.
Sumala ha mgta biktima, mayda na pipira nga mga pribado nga organisasyon sugadman mga government organizations an nagpadangat na hin bulig ha ira nga mga naapektaran han sunog, pero nananawagan la gihapon hira bulig mahitungod nga kinahanglan manggud han mga ine hin panapton ngan iba nga mga higamit sugad han tuunan, planggana, ngan iba pa nga ira magagamit ha kada-adlaw nga panginabuhi.
Waray naman daw kabarak-an pag-abot ha pagkaon mahitungod nga mayda ginhahatag nga pagkaon an barangay, city government, ngan usa party-list ha syudad agud masigurado nga mayda an mga ine kakaunon.
Pira gihapon nga mga pamilya an temporaryo nga nag-uukoy ha mga tents nga gintindog han mga opisyal han barangay ha Calvary Hill. Labot pa hine in mayda gihapon igin-hatag han syudad kumo temporaryo nga urukyan an Abucay Basketball Court pero concern han mga residente an kahirayo hine ngan karuyag gihapon han iba nga harani ha mismo ha Calvary Hill an ira temporaryo nga uukyan agud harani gihapon an ira panlimpyo, ngan harani gihapon ha ira pakabuhi, nga kaurugan in aada ha merkado-publiko.
Sumala kan Segunda Avila han mapakianhan han Bombo Radyo Tacloban kun may plano an ira pamilay nga bumalhin ha igin hatag nga evacuation center ha Abucay, in dire daw hira mabalhin mahitungod nga an ira trabaho in ada ha merkado-publiko ngan makukurian gihapon hira ha buro-biyahe.
Nakakarawat naman na daw hira hin bulig tikang mga organisasyon pero an iya gud araba in magkamay-ada hin kalugaringon nga balay mahitungod nga dako nga huna-hunaon ha ira pamilya an kawaray kalugaringon nga urukyan.
Sumala naman kan Marites Peñero, waray hiya maraot nga kaburut-on ha tag-iya han balay nga gintikangan han sunog mahitungod nga aksidente man an panhitabo nga dire man tinuyuan.
Waray daw gihapon hira pagkabaraka ha ira seguridad ha ira temporaryo nga gin uukyan bisan paman kun gin palibutan la ine hin trapal mahitungod nga aktibo an mga opisyal han barangay ngan tanod ha paglilibot ngan panginano han lugar agud masigurado an seguridad han mga residente.
(Via Bombo Nina Magpili)
