TACLOBAN CITY – Nakakaabat hin diskriminasyon an mga residente han Brgy. Villa Aurora ha Basey, Samar mahitungod han nahipatik nga local transmission han COVID-19 ha mao nga barangay.
Una hini, maabot ha 19 nga COVID-19 cases an nahipatik ha mao nga barangay ha sakob la hin usa kaadlaw rason para igkonsidera ini nga local transmission.
Sumala kan Crisencia Amante, kapitan han Villa Aurora, dire hira nakakagawas tungod nga ginkakadire hira han ira kasapit nga mga barangay.
Dugang pa hini nga may pipira gihapon nga mga residente han ira barangay an nagkalakat nala ngan nagpayag ha ira mga umhanan ngan mga bukid tungod han kahadlok.
Ha pagkayana in nagpapabilin nga nakalockdown an bug-os nga barangay han Villa Aurora agud nga matagan hin iwag an contact tracing ngan swab testing ha mga residente labi na gud ha mga nakahibalag han duha nga mga pasyente nga una na nagpositibo ha COVID-19.
