Tumestigos an founder han Meta nga hi Mark Zuckerberg ha korte kasumpay ha alegasyon nga gintatarget han iya kompansya an mga user nga menor de edad.
Igin rason han mga complainant nga naghihimo an tech company hin features nga nag-aaghat ha mga kabataan nga ma-hook o magin adik ha social media.
Ha iya syahan nga pag-atubang ha Los Angeles County Superior Court, dumipensa hi Zuckerberg nga “mischaracterize” an mga komunikasyon nga igin presenta kumo parte han landmark trial kun nakaka-adik an social media platforms sugad han Instagram para ha kabataan.
Sugadman in gin amin ni Zuckerberg nga makuri para ha Meta nga igpatuman an age restrictions ha Instagram.
Makapira kabeses na gihapon nga nagdig-on an Meta nga naghihimo na hin aksyon an kumpanya agud proteheran an mga kabataan nga user han social media ngan pagbawalan an mga edad 13 paubos nga gumamit han platform.
Nag-ugat an lawsuit kontra ha major social media platforms sugad han Meta, Google, Youtube, TikTok, ngan Snapchat, mahuman nga akusahan han lead plaintiff nga kilala ha iya initials nga K.G.M. an mga kompanya han pagpapadalagan ha mga ini ha nakaka-adik nga paagi nga nakakaruba o nakakaraot ha mental health han kabataan.
Pira nga mga nasud na gihapon an nagpapatuman hin restriksyon ha paggamit han social media ha mga kabataan. Pinakaurhi hini an Australia nga nagpatuman hin ban ha social media accounts ha mga edad 16 paubos.
Iginkokonsidera na gihapon han UK, Denmark, France, ngan Spain an kaparehas nga butang.
