TACLOBAN CITY — Ginpusil-patay an usa nga menor de-edad nga gin-aalegar lider hin notorious group han mga kabataan ha Barangay. Dagum, Calbayog City.
An biktima in kinilala nga hi “Alyas” Tinoy, 17-anyos ngan nag-uukoy ha Barangay. Aguit-itan ha mao nga siyudad.
Sumala kan PLt.Col. Erikson Del Rosario, Chief of Police han Calbayog City Police Station, nangangalap na hin mga abilable nga CCTV footages an mga kapulisan ha nasabi nga area agud makakuha hin mga posible witnesses.
Basar ha inisyal nga imbestigasyon, magpapa-volcanize la unta hin motor an biktima han tigda nala ini pagpusilon han waray makilal-i nga suspetsado.
Nakag-angkon hin inig-an hin bala hin pusil an biktima ha iya batok kun diin naglapos pa ini ha iya nawong nga naging hinungdan ha iya kamatayon.
Ha pagkayana in padayon pa an imbestigasyon han mga kapulisan ha naging motibo ha pagpatay ha mao nga biktima.
Nagdudumara na gihapon hira hin operasyon ha ikakadakop han suspek ha nasabi nga panmusil.
