TACLOBAN CITY – Plano nga dad-on ha Isabel, Leyte an mga medical waste nga tikang ha Mandaue City agud didto ig dispose pinaagi hin usa nga waste management facility.
Sumala kan Leyte 1st District Board Member Hon. Wilson Uy, ha iya pagberipika in may-ada pasilidad ha Isabel, Leyte nga nakarawat hin mga medical waste—amu an Cleanway Environmental Management Solutions Incorporated, kun diin ira gin didispose ha sakto nga proseso an mga hugaw.
Nagpaangbit naman ine han iya pagkabaraka mahitungod han kadamo han mga hugaw nga plano pagdad-on ha nasabi nga probinsya, kun diin gin aalegar maabot ine ha 300 ka-drums nga dagko nga medical waste.
Dugang pa hine, waray daw ngani an mga ine makigsumpayan o magpasabot namanla ha ira. Nahibaro nala daw hira dida han ginkakarga na an mga ine trucks tikadi ha Leyte.
An mga medical waste in kinahanglan gudman mailabog dayun ha sulod han 24-48 kaoras, pero ha pagkita daw ni Uy in haros sobra tulo na ine kasemana nga tambak ngan nagpakatago.
Sumala pa hine, dako an kadelikaduhan nga posible maidurot hine nga mga hugaw ha parehas katawhan han Isabel, Leyte ngan ha kalibungan.
Ha iya daw pamakiana ha usa nga konsehal ha Isabel, nahibaruan niya nga maiha na gudman nga nago-operate an nasabi nga waste management facility, pero dire pala ine maiha nga nagkakamay-ada hin bag-o nga pasilidad nga nagpo-proseso hin mga medical waste, kun diin sumala daw han konsehal, hira mismo in waray pa kumita ha nasabi nga pasilidad.
An iya la daw nahipapausahan in kun kay nga dadaraon pa nganhi ha Leyte an mga hugaw nga may-ada man gihapon waste management facility nga kaparehas han aadto ha Isabel ha Consolacion, Cebu ngan tulo nga iba pa ha Cebu Province.
Waray naman daw problema kun gutiay la an kadamo hine nga mga medical waste o kun mga kanan tinag-usa la kaadlaw nga hugaw, pero kun sugad daw kadamo ha usa nga bagsakan in dako an posibilidad nga makadistroso ine ha mga katawhan.
