TACLOBAN CITY- Guinkakasina ni Mayor Gerard Espina han Naval, Biliran an nadelatar nga pagpagawas han social pension ha mga benepisaryo hini.
May kalabutan hini, nagmando an mao nga mayor ha mga SB Member o mga municipal councilor nga magdumara hin mahugot nga imbestigasyon ha Municipal Social Welfare and Development Office (MSWDO) han Naval.
Panuyo hini nga mahisabtan an guinbubuhat han mga tinaglawas ha mao nga departamento kun kay ano nalalangan an pagrelease ha social pension.
Guinpahayag liwat ni Mayor Espina nga sunod- sunod nga meeting an pagdudumaron ha sunod nga semana para masolbar an problema han MSWDO .
Guinduon naman han mao ng opisyal nga diri hini guintotolerate an guinbubuhat nga pagpabaya han mga empleyado ha munisipyo han Naval, Biliran.
