TACLOBAN CITY – Ginpatutsadahan ni incumbent Ormoc City Mayor Richard Gomez an katugbang pagka-kongresista han iya asawa nga hi Winnie Codilla.
Ini in kasumpay ha naging pahayag ni Codilla nga daw in diri napupuypoy ni Gomez an problema ha ilegal nga droga ha ira lugar.
Sumala naman kan Mayor Goma, diri pa nauubos an ilegal nga droga ha ira syudad mahitungod nga mismo daw hi Codilla in dabi gihapon hini.
Iginduon han mao nga alkalde nga kaupod hi Codilla ha drug watchlist ni Presidente Rodrigo Duterte kun diin ada ini ha ika-461 nga pwesto.
Dugang pa hini nga nadepende daw la ha drug money hira Codilla.
Mahibabaruan nga ginbansagan kumo drug capital an Ormoc City ha Sinirangan Bisayas han lumingkod ha pwesto hi Gomez pero ini naman an naging pinakasyahan nga syudad ha rehiyon nga naideklara nga drug cleared.
Gindeklara gihapon an syudad kumo Safest City in the Philippines han tuig 2017 ngan ha presente nga tuig mahitungod nga ini an may pinakahamubo nga crime rate subay ha datus han Philippine National Police
Mababaruan nga una na nga nagpahayag hi Winnie Codilla han maghaon ini hin Certificate of Candidacy ha Provincial Comelec nga bumalik daw an paghurak han iligal nga droga ha Ormoc nga naundang na dati han hira pa an nalingkod ha pwesto.
