TACLOBAN CITY – Gindiwara ngan ginkokonsidera han Bureau of Fisheries and Aquatic Resources Eastern Visayas an nakalat nga impormasyon ha Facebook hiunong han pagdidiri han pagkaon han mga isda ha rehiyon tungod han presensya han Red Tide, kumo usa nga FAKE NEWS.
Sumala ha mao nga buhatan in puydi nga kaunon an mga isda nga tikang ha mga kadagatan ha atun rehiyon, ha kaluyo han mayda Local Red Tide Warning basta siguraduhon daw la ini nga presko, huhugasan hin maupay ha running water ngan tatangalan hin hasang.
Gin aaghat nira an publiko nga tumuod la ha mga reliable sources in labi na ha ira naman Facebook page.
“Sakto nga balita, makakabulig ha kada tagsa. Isda ha rehiyon otso, pwede kaunon basta presko, limyo ngan sulod han ginhawa tatanggalon.” Kaparte han post han BFAR Eastern Visayas.
Ha pagkayana in nakaisa an Local Red Tide Warning ha mga kadagatan han:
- VILLAREAL BAY, Villareal, Samar
- DARAM ISLAND, Samar
- ZUMARRAGA ISLAND, Samar
- MAQUEDA BAY, Samar (Jiabong, Motiong, Paranas, San Sebastian, Calbiga, Pinabacdao, Hinabangan)
- CAMBATUTAY BAY, Tarangnan Samar
- IRONG-IRONG BAY, Catbalogan City
- Coastal Waters of CALBAYOG, SAMAR
- MATARINAO BAY, Eastern Samar(General MacArthur, Quinapondan, Hernani, and Salcedo)
- GUIUAN, EASTERN SAMAR
Diri aada ha listahan han mga “safe areas” an mao nga mga kadagatan ha aton rehiyon, mahitungod han pag POSITIBO ha Pyrodinimum bahamense, usa nga nakakahilo nga microorganism nga nagdudurot hin Paralytic Shellfish Poisoning (PSP) an samples han tubig-dagat.
An mao nga warning in mahugot nga igindidiri an panguha, pagkaon ngan pagbaligya hin tanan nga klaae hin panti-on (Shellfish) ngan Acetes sp (Alamang)
“An isda, nu-os, pasayan ngan masag in pwede igkomsumo bisan tikang hini nga mga kadagatan basta siguraduhon la po naton na presko an mga inin, tatangalan han ira mga lamang loob sugad han tina-i ngan hasang, ngan huhugasan hin maupay gamit an running water.” Pagklaro pa han opisina.
