NATIONAL– Gin klaro han Palasyo han Malakanyang nga bisan anu ine dire nira ighahalot an anuman nga klase hin bulig ha mga sektor nga nanginginahanglan, subay han ginpapatuman nga balaod.
Ginbuhat ni Communications Usec. Claire Castro an pahayag mahuman nga madismaya an pira nga mga transport group mahitungod nga gin kansela han gobyerno an fuel subsidy.
Syahan na nga ginmalatumat ni Presidente Ferdinand Marcos Jr. nga waray rason para igdayon an subsidya mahitungod nga nagkakamay-ada naman hin pag-ubos ha presyo han petrolyo ha World Market.
Pag-eksplikar ni Castro nga dire malilikayan an sugad nga sitwasyon kun diin dire dayun nakakapag-desisyon an Presidente.
Dugang pa hine, ine in nakadepende la gihapon ha mga panhitabo nga sitwasyon ha presente nga panahon.
Ha kaluyo hine in ginsigurado han opisyal nga ira gintututukan an mga panhitabo ha Middle East partikular na ha Iran ngan Israel.
