TACLOBAN CITY- Arestado an suspek ha pagpatay han duha nga menor de edad mahuman ine nga panigbason ha Barangay San Pedro, Albuera, Leyte.
Ginkilala an mga biktima kanda alyas Mary, ngan Rodjun ngan hi alyas Gina, nanay han mga biktima nga nakag-angkon hin samad ha lawas.
Samtang, ginkilala naman an suspek kan alyas Elorde step father han kabataan.
Sumala kan Pmaj Angelo Sibunga, Officer In Charge Albuera Municipal Police Station, nga subay ha ira inisyal nga imbestigasyon, selos an hinungdan han insidente, kun diin nagresulta ine hin panawtaw ha magtala-iroy.
Dugang pa ni Sibunga, usa nga concern citizen, an umaro hin bulig ha kapulisan, ngan dayon naman an mga ine rumesponde ha crime scene.
Pag-abot han mga kapulisan ha panimalay han mga biktima, na-abtan nira nga nagkakarigo na ha ira kalugaringon nga dugo an magtala-iroy.
Dayon naman nga naawat an kinabuhi han duha nga minor de-edad ha mao nga insidente, samtang an nanay naman han mga ine in ada ha kritikal nga kondisyon.
Mababaruan, nga an nasabi nga mga biktima nga menor de edad, in anak han anay nagin asawa ni alyas Gina, karuyag sidngon mga hinablusan ine ni alyas Elorde.
