Usa nga dako nga ayat ha pisikal nga kusog nga karig-on han huna-huna an iginpakita han duha nga atleta tikanga ha Michigan, U.S mahuman nga makab-ot an Guinness World Record para ha “longest marathon playing singles pickleball”.
Opisyal nga ginkilala han organisasyon hira Brad Haverkamp ngan Caleb Dang mahuman nga magmulay hin waray hunog ha sulod han 28 kaoras. Nahitabo an record-breaking attempt dida han katapusan nga parte han Nobyembre 2025, pero yana la nga bulan iginpagawas an opisyal nga kumpirmasyon mahuman nga panginanuon hin maupay han Guinness an mga igin pasa nga ebidensya ngan video footage.
Subay ha mahugot nga aludaydaay han Guinness, singko-minutos nga pahuway la an igintutugot ha kada usa kaoras han pagmumulay.
Ginamit nira an haligot nga oras agud madagmit nga kumaon, uminom, ngan gumamit hin kasilyas ugsa bumalik ha court.
Igin hulagway ni Dang an duro kakuri nga ayat, labi na han pag-abot nira ha kabutngaan han mulay kun diin namanhod na an iya lawas ngan huna-huna.
Dire naman ini an syahan nga higayon nga nagprubar an duha ha pag kab-ot hin world record.
Dida han 2024, ginprubaran nira nga makuha an parehas nga titulo para ha naman ha doubles pickleball, pero waray hira magmalangpuson.
Mahitunagod ha dedikasyon ngan determinasyon, utro hiya nga naghag-id ngan bumalik agud mahiuli an world record ha kategorya nga singles.
