TACLOBAN CITY – Maabot ha 1.2 million pesos an ginbabana-bana nga kantidad hin ilegal nga droga an narekupo han mga otoridad ha gindumara nga drug buy bust operation nga nagresulta ha pagkakabungkag han usa nga drug den ha Barangay 21-A, Gomez Street, Tacloban City.
Sumala kan Rogellete Urgel, tagapagyakan han Philippine Drug Enforcement Agency (PDEA) Regional Office 8, an pagkakadisrungkar han mao nga drug den in nagresulta gihapon ha pagkaaresto han upat nga mga suspetsado.
Ginkilala an mga ini nga hira Rey Marck Macawile, 28 anyos, drug den maintainer, Jackie Morales, 29 anyos, Sherwin Mark Troyo, 30 anyos parehos residente han Tabango, Leyte, ngan hi Jay-R Ramilo, 39 anyos nga residente naman han Tacloban.
Ginbabana-bana nga maabot ha 200 grams hin gintutuuhan nga shabu an nakumpiskar tikang ha mao nga mga suspek.
Ha pagkayana in nakapaslak na an mga ini ha PDEA 8 Detention facility.
Padayon naman nga ginpapamulat han PDEA an opisyal nga report tikang ha laboratory kun pira an kabug-usan nga kantidad han nakumpiskar nga ilegal nga droga.
