TACLOBAN CITY- Kapot na hiton mga otoridad an gintutuuhan ikaduha ha pinakahitaas nga lider han New People’s Army ha Sinirangan Bisayas mahuman ini maaresto ha gindumara nga joint inter-agency operation ha Barangay Pitogo, Consolacion, Cebu.
An suspek in ginkilala kan Romulo Micabalo, alyas Ned, gin aalegar usa nga notorious lider han Eastern Visayas Regional Party Committee (EVRPC) nga responsable han damo nga pag-atake ha mga sibilyan ngan kasundaluhan.
Sumala ha report tikang ha 8th Infantry Division han Philippine Army nga nakabase ha Catbalogan City, Samar, hi Micabalo iton primero nga responsable ha pagsunog han mga heavy equipments nga gingamit ha pag ayad hiton Jipapad – Las Navas ha Barangay Quirino ngan Barangay San Francisco, Las Navas, Northern Samar dida han nakalabay nga Hulyo 29, 2021,
Kaupod daw gihapon ini ha mga nag ambush han mga sundalo ngan tulo nga myembro han CAFGU ha Barangay 4, Jipapad, Eastern Samar dida han Hulyo 29, 2021 ngan pag atake ha Community Support Program Team nga naghatag hin seguridad ha gintitindog nga school building ha Barangay Dorillo, Jipapad, Eastern Samar dida han Oktubre 7, 2022 kon diin usa nga 10 anyos nga bata iton nasamaran.
Hiya gihapon in dati nga myembro han Regional Sentro De Gravidad – Compaq han North Central Mindanao Regional Party Committee (NCMRC) nga nag-ooperate ha Northern Mindanao.
An suspek in mayda warrant of arrest para ha kaso hin kidnapping with serious illegal detention ngan robbery with violence against or intimidation of person nga gin issue ni Judge Fernando Fudulan Jr. han Branch 7, Regional Trial Court ha Bayugan City, Agusan Del Sur.
