CARIGARA, LEYTE – Waray pa nagkukuha nga pamilya han lawas han tulo nga lider han New People’s Army nga namatay ha engkwentro han mga kasundaluhan han 93rd Infantry Battalion dida han nakalabay nga Hunyo 18, ha Barangay Cogon, Carigara, Leyte.
Ine in sumala kan Philippine Army 8th Infantry Division Division Public Affairs Office, Maj. Jefferson Mariano.
Manunumduman nga nagka-engkwentro an 93rd Infantry Batallion ngan grupo han mga rebelde dida han nakalabay nga semana kun diin tulo nga lider an namatay.
Ginkilala an mga ine kanda Juanito P. Sellesa Jr., alias Tibor, Executive Member; Eugene Paclita, alias Dimple, Squad Leader han Squad 2; ngan Lito L. Delante, alias Dodong, myembro han pareho nga unit.
Gintotoohan naman nga membro an mga ine han Squad 2, Island Committee (IC) LEVOX han Eastern Visayas Regional Party Committee (EVRPC).
Narekober gihapon han militar an usa nga M16 rifle, duha nga long magazines, usa nga calibre .45 pistol nga mayda duha nga magazines, usa nga granada, ngan mga personal nga dokumento.
Gin dayaw naman ni 8th Infantry Division Commander, Major General Adonis Ariel Orio, an malinampuson nga operasyon han tropa han 93rd Infantry Batallion, kun diin an nasabi nga operasyon in resulta han mahugot nga civil military operation han mga kasundaluhan.
