TACLOBAN CITY – Patay an usa nga lalaki nga nagpalit la hin tuba ha Sitio Spillway, Brgy. Poblacion, Kananga, Leyte mahuman nga pagpamusilon han waray pa kakikilal-i nga suspek.
Ginkilala an biktima kan alyas Igan, 33-anyos an pangidaron, ngan residente han nasabi nga lugar.
Sumala kan PMaj. Romeo Sudario Jr., Chief of Police hiton Kananga Municipal Police Station, kauuli pala han biktima kahuman palit hin tuba han tigda la ine nga paarakan hin bala han waray pa kakikilal-e ngan suspek nga nakabantay na gidaan ha biktima.
Nag-angkon naman hin pinulisan ha magkaduru-dilain nga parte han iya lawas an biktima kun diin nakarekober han mga otoridad an maabot ha 20 nga basiyo han bala.
Dayun naman nga gindara ha Kananga Municipal Hospital an biktima pero ginsuhestyunan ine nga igbalhin ha EVMC pero pag abot ha EVMC in gin deklara na ine nga dead-on-arrival.
Nagpapadayon pa naman an imbestigasyon han mga otoridad agud mahibaruan an motibo an krimen ngan kun hin-o an nagpapaluyo hine.
