ODD – Usa nga lalaki ha Arizona, US an nakaghipatik hin world record tungod ha koleksiyon niya nga Coprolite o fossilized nga baya han dinosaur ngan iba pa nga ancient animals.
Ginkumpirma han records keeping organization nga Guinness World Records nga hi George Frandsen an nagpapabilin nga record holder han titulo nga “World’s Largest Collection of Coprolite” tungod ha koleksiyon niya nga fossilized feces nga maabot na ha 8,000 pieces.
An coprolite in mga nagtig-a nga baya han kadaan nga hayop o tawo. Ini in importante nga mga artifact ha paleontology ngan archeology,
tungod pinaagi hini pupuydi nga matudlok an mga klase han pagkaon, sakit ngan iba pa nga impormasyon kasumpay ha mga kada-an nga tawo.
Yana in umabot na ha 8,000 an mga nakoleksyon ni Frandsen nga coprolite. Tungod hini nagdesisyon hiya nga magresign ha iya corporate job ngan magtindog nala hin museum kun diin igdidisplay an ngatanan han iya collection.
Gintawag naman niya an iya museum nga “Poozeum”.
