TACLOBAN CITY – Waray na kasalbar an kinabuhi han usa nga lalaki kahuman ini malumos ha kadagatan han Brgy. Pinut-an, San Ricardo, Southern Leyte dida han 8:30 han aga han nakalabay nga adlaw.
Ginkilala an biktima kan alyas Ric, 44 anyos an pangidaron ngan residente han San Ricardo, Southern Leyte.
Basar han imbestigasyon han mga otoridad, nga pumakadto an biktima kaupod an mga amyaw hini ha dagat ngan lumangoy ini samtang hubog. Dayon nga iginkabaraka han mga upod hini kahuman nga maabot hin 30 ka minutos in aada lagihapon ha ilarum han tubig an biktima kun diin, gintutuohan nga nalumos na.
Ginpamiling ini han iya mga amyaw kun diin, natad-an nala ini nga waray na kinabuhi an biktima.
Dayon naman ini ginrespondihan han mga otoridad pero gindeklara nga patay na ini. Waray naman may nakikita nga foul play ha nasabi nga insidente.
