ODD – Usa nga 86-anyos nga sports commentator ha Turkey an nakaghipatik han world record mahitungod ha unom kadekada niya nga career.
Gin kumpirma han records keeping organization nga Guinness World Record nga hi Orhan Ayhan an pinakabag-o nga record holder han titulo nga ‘Longest Career as a Sports Commentator’ mahitungod ha 61 katuig niya nga pagtatrabaho kumo commentator han magkaduru-dilain nga sports tikang pa han 1963 kutob ha presente nga tuig.
An event nga syahan ine nga nagin sports commentator in dida han Enero 1963 kun diin nagtugbang an Turkey ngan Italy ha European Cup football match. Ha radyo pa hiya hadto nagcocommentate mahitungod nga waray pa television broadcast ha Turkey.
An mga importante nag sporting events nga iya na-cover in an mga boxing events ha Olympics dida han 1972, 1996, 2000, 2004, 2008 ngan 2012.
Labot la ha pagigin commentator, sports columnist gihapon hiya ha pira nga diyaryo ha Turkey.
