Nanawagan hi Senate President Sherwin Gatchalian ha mga otoridad nga siguraduhon nga talwas ngan maupay an pagdudumara han pag-aresto kan Sen. Ronald “Bato” dela Rosa agud malikayan an karahasan ngan posible pagkamatay han mga sibilyan ngan operatiba.
Ha usa nga panayam, ginpahayag ni Gatchalian nga importante nga masigurado an katalwasan kaupod hi Dela Rosa ngan han mga law enforcer nga magdudumara han operasyon, mahitungod nga delikado an sugad nga klase han pagpapatuman han balaod.
Gintagan-duon hini nga kinahanglan magin hapsay an pag-aresto, labi na mahuman an mga pahayag han Department of the Interior and Local Government (DILG) nga posible umabot ha karahasan an operasyon.
Nauna na nga ginmalatumat ni Interior Secretary Jonvic Remulla nga posible umabot 10,000 an mamatay kun sapiritay nga aarestuhon hi Dela Rosa. Mahitungod hini, sumala kan Remulla, nakikipagnegosasyon an gobyerno agud maaghat an senador nga sumurender.
Sugadman, iginduon ni Gatchalian nga kinahanglan dig-unan hangobyerno an otoridad hini ha atubanganhan report nga mayda armado nga grupo nga gin aalegar nagbabantay kan Dela Rosa.
Syahan na nga ginmalatumat han Senate President nga dire dapat nakikipagnegosasyon an gobyerno ha mga armado nga grupo nga waray otorisasyon nga kumapot hin armas, labi na kun kaupod an mga ini ha mga grupo nga kriminal o terorisyta.
Dugang pa hini, posible nga mag-baga-baga hin maluya an gobyerno kun makikipagnegosasyon ini ha mga grupo nga dapat unta in ada ha ilarom han balaod.
Sugadman, gin klaro ni Gatchalian nga dire hiya maaram han bug-os nga detalye kasumpay ha grupo nga gin aalegar nagpo-proteher ha senador. Naiintidihan gihapon niya kun kay-ano dire iginlalatag han mga otoridad an pira nga impormasyon mahitungod ha mga konsiderasyon nga pan-seguridad.
Manunumduman nga igin anunsyo na han gobyerno an P50 milyon nga pabuya agud makabulig ha pag-aresto kan Dela Rosa, samtang gintagan naman hiya han Philippine National Police hin usa kasemana agud sumurender.
Naaatubang hi Dela Rosa ha warrant of arrest tikang ha International Criminal Court kasumpay han daw crimes against humanity ha kampanya kontra droga han adminitrasyon ni anay presidente Rodrigo Duterte.
Samtang, ginmalatumat ni Gatchalian nga waray hira nakarawat nga anuman nga kumunikasyon tikang kan Dela Rosa, kaupod an posible hangyo nga igbutang hiya ha kustodiya han Senado. Urhi daw hira nga nagkaistorya dida han magpakuta an Senador ha Senado dida han Mayo.
