ODD NEWS– Usa nga lobster diver ha Massachusetts an himala nga nakatalwas mahuman nga kaunon ngan tunlon hin buhi han usa nga balyena samtang hiya in nagsisisid para mandakop hin lobsters.
Nag alagid-agid hin istorya ni Jonah ha Bibliya, an natabo kan Michael Packard nga maiha na nga nagpapakabuhi kumo lobster diver.
Sumala kan Packard, tigda nala daw nga nagsirom an iya palibot samtang nagsisisid hiya ha 45 feet nga kadagatan harani ha Cape Cod.
Han syahan in huna niya nga gin-atake hiya hin pating pero waray naman daw hiya naaabat nga kagat o ul-ol ha lawas.
Gintulon ngayan hiya han usa nga humpback whale. Nakaabat dayon hin kahadlok hi Packard tungod nga bangin hiya maubusan hin hangin ha iya tangke.
Maupay nala nga ginluwa gihapon hiya han balyena mahuman an 30-40 ka-segundos.
Nag-angkon hin mga pasa ngan sakit ha lawas hi Packard tungod han pagkakaluwa ha iya han balyena.
Nagpasalamat hin Packard ha iya pakatalwas, labi na nga huna niya mamatay na hiya han nakadto pa hiya ha sulod han balyena.
